ITEM, For-sa-meikle as there hes bene divers Acts and statutes made of before, that na maner of person, nor personis suld schut with Culveringis, Crosbow, or handbow ony time, at Da, Ra, Hart, Hynde, Hair, Cunning, Dow, Herron or foule of river, under special pains, conteined in the saidis acts and statutes. And notwithstanding the samin, and that na execution hes followed of before, upon the persones contraveneris of the saidis Actes, they ar sa lichtlie esteemed, that the saidis Beastes and Foules, are at all times slaine down, & destroyed be sik persones, that nouther hes regaird to the commoun weill, nor policie of the countrie.

Theirfoir it is statute and ordained, be our Soveraigne Lord, with advise of his Regent, and the three Estaitis of this Realme, that quhatsumever person or personis, of quhat Estaite, degree or conditioun that ever they be of, schuttis in ony times cumming, with Culvering, Crosbow, or Handbow, at Da, Ra, Hart, Hynde, Hair, Cunning, Dow, Herron, or foule of river, within this Realme, sall foirfault and tyne their haill moveabil gudis, that ane halfe thereof to our Soveraine Lordis use, and the uther halfe to be applyed to the Judge, and apprehender of him that committis the crime, to bee divided equallie betuixt them. And to that effect, ordainis all Schireffes, Stewardes, Baillies of Regalitie, and all uther ordinar Judges, with sik uthers, as sall please our Soveraine Lord, & his Regent to give power & commission, to call the contraveneris of this present Act, {367} at particular diettis. And gif they be convict of the crime, to escheit all their moveabil gudis, to be applyed in maner foirsaid. And gif the committer of the cryme be ane vagabound not havand gudis, that the Judge, quhom befoir he is conuit, keip and hald him in prison, for the space of fourtie dayis. And that for the first fault. And the nixt fault, to cut of his richt hand.